Maton, egn liac par far vacànzas
An mintga stagiùn porscha Maton egn clima amparnevel a mievel cun blear sulegl. La cuntrada intacta cun bealas vischnàncas ad objects culturals, igl ruos, las muntognas imposàntas Pez Bavregn, Pezas d’Annarosa*, Bruschghorn a la grànda variaziùn an fauna a flora fan davantar Maton egn liac adato pigl turissem da stad a d’unviern. Da stad porscha egna reet da veias da viandar marcadas variaziùn ad avanturas par giuven a vigl, a d’unviern las veias da scursalar a turas da skis atractivas a siiras.

Pez Tarantschun

An l’ustreia "muntsulej" a l’antscheata da la vischnànca, san ign reservar tgombras sco ear avdànzas da vacànzas Reka ad otras pussevladads par star sur notg. Ear diferaintas avdànzas da vacànzas privatas ad aclas statan a disposiziùn. Igl Hotel Vizàn a Vargistagn a l’ustreia Orta a Lon porschan mademameing tgombras par giasts. L’anteriura tgea da scola da Maton, c’e vagnida renovada dacurt, porscha plaz par 40 parsùnas. Mo ear grupas ple pintgas sasaintan bagn an quella tgea. Pigl atun 2011 e planisada l’avertura da la pensiùn Laresch, la quala vean construida actualmeing.

*Annarosa – igl mitos
Avànt blears ons s’udeva l’Alp Annarosa a duas soras, l’Anna a la Rosa. Da lez tains eara la busetga ànc verda. Parquegl devan las vatgas a tgoras tànt latg, c’ellas stuevan vagnir mulsas ear da miezgi. Ign saveva strusch tge far cun tut que latg. Egn beal gi en las duas soras idas giou an la val a far egna visita ad en turnadas sen l’alp per ancùnter sera. Parquegl earan igls animals betga vangieus muls da miezgi. La busetga veva dantànt catscho tànt latg agls ivers ca quels en schlupos. Las duas soras ân sagritanto talameing c’ellas ân schmaladieu l’earva. Senaquegl e la busetga satgeada a las vatgas a tgoras ân mena ple do tànt latg. (L’Alp Annarosa s’oda oz a la Corporaziùn da Muntogna Val Schons).