Vacànzas a Maton

A Maton dominescha egn clima amparnevel a mievel cun blear sulegl da mintga stagiùn. La cuntrada intacta cun prazius maletgs da vitgs ad objects culturals, la ruassevladad, l’imposànta culissa muntagnarda (Pez Bavregn, Pezas d’Anarosa) a la multifara fauna a flora distingua Maton par egn turissem d’unviern a da stad modero. Da stad egna bagn marcada vasta ret da sendas da viandar a d’unviern egna veia da scursalar a la pussevladad da far atractivas a siiras turas da skis porschan activitads ad aventuras par mintgegn a mintgegna.

A Maton a cuntrada dat igl varsaquàntas pussevladads da pernotar, ascheia soda a la vischnànca la tgea da scola viglia ca vean oz nizagida sco quartier da grupa. Ella e adatada par classas da scola near ear par tgomps da viandar a far turas. Que quartier e vagnieu realiso cun grànd agid digl martgieu da Kreuzlingen.

Davenda l'unviern 2004 dat igl avdànzas da vacànzas da Reka sco ear ulteriuras pussevladads da pernotaziùn an la nov’ustreia «tgea muntsulej» ca satgata a l’antrada da la vischnànca. Sper la «tgea muntsulej» a Maton, igl hotel restorànt Piz Vizàn a Vargistagn ad igl Albiert Orta a Lon, ca porschan la pussevladad da pernotar, san ign ear afitar avdànzas da vacànzas privatas near schagea tigias d’acla.

Se Maton riv’ign adegna cumadevlameing cun mieds da trafi public near cugl auto privat (sur la A13 antocen sortida Zillis/Andeer).